అందరూ వాన కురిసిందని ఎందుకంటున్నారో
నాకైతే అమృతం కురిసిన రేయిగా అనిపిస్తుంటే
మొన్నలా లేని నిన్నటి రోజు
నాకు తోడై నువ్వున్నావనిపించాక
కన్నీరూ తీయనయ్యిందంటే నమ్మేదెందరో..
ఎవరూ సాహసించి అడుగిడని నా ఏకాంతంలో
పాలనురుగువై కదిలావంటే
నేను తడిచింది నిజమేగా
ఇన్నాళ్ళూ వెలగని దీపికలు
నిశిరాతిరిని తరిమింది కల కాదుగా
విషాదాన్ని ఆలపిస్తూ పంచమాన్ని మరచిన పెదవికి
అర్ధాన్ని అల్లుకొని
పల్లవించు పరవశపు పులకలు పూసింది నిన్నేగా
అవును..నీవల్లే..
వర్షమంటే గుబులై మండిపడే నాకు
ప్రేమతుంపర్ల ప్రియమైన సౌరభాలీనాడు..
రసఝరి మడుగులో మునిగినట్లుందీ అనుభవం
మళ్ళీ మళ్ళీ వానొస్తే మొలకెత్తాలనే మరో జీవితం..!
No comments:
Post a Comment