//తమస్సు//

నన్ను నేను మరచి..
నీ పిలుపుకై దారి కాచి
కన్నుల్లో తామర ఒత్తులు వెలిగించుకొని
రేయంతా నిరీక్షించింది నిజమేగా

నా ప్రతిమాటకూ
అగరొత్తుల అత్తర్లు పూసినా
వెగటు పుడుతోందని..
నీ పలుకు శూలాలతో పొడిచి
మదిని గాయపరిచింది నిజమేగా
ఎప్పుడైనా
నాకు నేనుగా
నాకిష్టమైన పాటగా పల్లవించగలిగానా
ఎప్పటికప్పుడు నిందారోపణలతో
అనుక్షణం వెంటాడే నీడవై
చీకటి రక్కసిలా నన్ను భయపెట్టేది నిజమేగా
పుల్లవిరుపులూ..మూతివంకర్లు
అభిమానం నొచ్చుకొనేలా మాటలూ
నన్ను హింసించడమే ధ్యేయంగా ఈటెలు
కన్నీటి తెరలకి అంకితమిచ్చి
నిర్జనగృహంలో నన్ను నిర్బంధించి
బ్రతికుండగానే ఆత్మసమాధి చేసింది నిజమేగా
ఆ మనోవైకల్యం
నీలో ఎందుకలా పురివిప్పిందో గానీ
పరాభవంతో నన్నో పరాజితను చేసింది
అందుకే
ఇప్పుడేం చెప్పినా దండుగే
ఆశలన్నీ నీరుకారి తరలిపోయాక
ఎండిన హృదయం..
ఏకాంత తమస్సును హత్తుకున్నాక..!!