//నాలో సంగీతం//

ఆ సంగీతం
ఎటుపోయిందో..
నన్ను నాకు కాకుండా చేసి నీతో వచ్చేసింది
ఐతేనేమి..
ఆమనొస్తే కోయిల కూయడం సహజమైనంత గమ్మత్తుగా
నీ గాత్రంలోని గీతం నా హృదయాన్ని మెలి తిప్పింది
నువ్వు ప్రేమించిందీ సంగీతాన్నే కదా
నా ఎదంతా తపనల సరిగమైనప్పుడు పొరబడ్డానేమో
నీ గమకంలో పలికిన తమకాలు నావేనని..

భరించరాని సంతసం విషాదానికి దారి తీసినట్లు
నువ్వు చల్లిన భావాల మత్తు నుంచీ బయటపడలేదింకా
చూపులకు అందనంత దూరంలో నువ్వుంటున్నా
హృదయన్ని వెంటాడే వేదనలా
నీ పాట వినబడుతోందిలే
ఒంటరితనమో శాపమనుకున్నా ఇన్నాళ్ళూ
నన్ను ఆనందానికి దూరం చేసిందని
ఇప్పుడిదే బాగుందనిపిస్తుంది
నా ప్రేమతపస్సులో నీ స్వరం
కవితాత్మగా కమ్ముకుంటుంటే..!!