// ఆ కళ్ళు//

// ఆ కళ్ళు//

కలల యవనికను గుట్టుగా తెరిచే వాకిళ్ళు..
తలపులకు తలుపులు తీసే అందమైన లోగిళ్ళు..
రెప్పల సయ్యాటలో దాగిపొమ్మనే సంకేతాలు
కమ్మని కౌగిలికి రమ్మని ఆహ్వానించే చిలిపి నెగళ్ళు
వేల ఆనందాలకాంతులు తనలోనే ఇముడ్చుకున్న గోళాలు
ప్రకృతి భాషను ప్రేమగా చదివే జావళీలు
ఆమని నయగారాలు సన్నగా వొంపు కెరటాలు
పిట్టల రెక్కల చప్పుళ్ళకి తాళమేసే కిటికీలు
పెదవుల వలపుపదాలకు తాళమేసే రవళులు..
ఊసులకు మరువాలనద్ది పరిమళింపజేసే యుగళాలు..
వెన్నెల మౌనాలను రట్టు చేసే సందళ్ళు..
వెరసి..
ప్రియమైన చెలికాడ్ని చాటు చేసే మేఘాలు..
విరహించిన మదిలో తమకాన్ని రేకెత్తించే మోహాలు..wink emoticon

//మనసు దాహం//

//మనసు దాహం//

మనసుదాహమెన్నటికీ తీరదనే అనుకున్నా..
నువ్వు నాలోకి అడుగులేసే వరకూ
తడబడే నా గుండెను వాత్సల్యంతో అదిమి పెట్టేవరకూ..
ఏకాకితనమప్పుడే చిగురించిందనుకుంటా..
జీవనకాసారంలో నీతో పయనం మొదలైనప్పుడు..
నీ నవ్వుల అంచుల్లో ఊగుతున్నప్పుడు గమనించనేలేదు..
నువ్వో పెదవిప్పని మౌనానివని..
అయితేనేమిలే..
నీ మౌనం..
నా నిశ్శబ్దాన్ని పూరించింది..
ఓదార్చే వీచికై నా ఏకాంతాన్ని ముద్దాడింది..
ఊహలకందని అంతర్నాద సంగీతమై ఓలలాడించింది..
కొమ్మకొమ్మలోని కోటిరాగాలనూ వినిపించింది..
అలజడిలేని అందమైన కావ్య ప్రవాహంలో తోడుగా నిలిచింది..
దప్పిక తీరని నదికి నీ దరి సాంత్వనిచ్చింది..!!

//హేమంతం//

//హేమంతం//

మొత్తానికొచ్చింది హేమంతం..
ఇన్నినాళ్ళ ఎదురుచూపులకి సాంత్వనమిస్తూ..
రెప్పలకి రెక్కలు తొడిగి..
అంతఃచక్షువుల ద్వారాలు తెరిచి
స్వర్గలోకపుటంచులను దాటి పైకెగిరి..
నులివెచ్చని మధురోహలను హత్తుకోమంటూ..
స్మృతుల ప్రవాహంలో తేలియాడిస్తూ..
గడచిన అనుభూతుల గంధాన్ని మదికి పూసి..
పూలపుప్పొళ్ళు పూసుకున్న సీతాకోకలా ముద్దులొలుకుతూ..
ఊపిరిని వెచ్చబెట్టి కాంక్షను పురిగొలుపుతూ..

కాటుకకన్నులను మంత్రించే తన ఎర్రని చూపులు..
పగడపు పెదవుల్లో పూయించిన నిష్కారణపు నవ్వులు..
వెల్లువైన చలికి ఒణికి తొణికిన దేహతంత్రులు..
అంబరాన్ని చుంబించాలనిపించే భావాకర్షణలు..
ఎంత గ్రోలినా దప్పిక తీర్చలేని రసవాటికలు
మౌనంలోకి ఆవిరైన చిలిపి సంకేతపు అలలు..
వర్ణనాతీతమైన కల్పనా సౌందర్యాలు..
కన్నుల యవనికపై తారాడి నిదురను భగ్నం చేస్తూ..
మరపురాని ఆనందాన్ని పున్నాగ అల్లికలై పెనవేస్తూ..

//రాతిరి రాగం//

//రాతిరి రాగం//

నిన్ను పరిచయించిన పున్నమే...నాలో వెలుగులు చిమ్మింది
వరమైన కల తనువుకు తీయందనాలు పూసి..
జాబిల్లికి చేయిచాచే సాహసం ఇచ్చింది
హృదయతంత్రులను మీటిన సంగీతం..
మరుమల్లె సిరులకు నవ్వులను కానుకిచ్చి
అమృతక్షణాలకు ఆజ్యం పోసింది..
కలవెంక ఒదిగినట్లు నీ కౌగిలిలో..
అనంతవిశ్వరహస్యమై నే దాగినట్లు..
మోడ్పులైన చూపుకి ఆవహించిన మత్తు
రాగరంజితమైన సిగ్గులు మోముకు చేర్చి
బుగ్గలూరిన ఆనందాన్ని యుగళం చేసి..
గులాబీ పరవశాన్ని దరహాసం చేసింది..
అనురాగపు పరిమళాన్ని లోలోనే చవిచూడమంటూ

//కొన్ని జీవితాలు//

//కొన్ని జీవితాలు//

శ్రమ విభజన సరిగానే జరిగేదేమో ఆనాడు..
కనుకనే సంసారాలంత సజావుగా సాగేవేమో..
పరస్పరావగాహనతో బాధ్యతలు పంచుకున్నందుకు..
సంప్రదాయం విధించిన పాత్రలను ఇరువురు సమంగా పోషించినందుకు..
భర్త కష్టపడి సంపాదించడం..భార్యాబిడ్డల్ని కాపాడటం
ఇల్లాలు ఇంటినీ..పిల్లలనూ చక్కదిద్దడం..
సామాజిక ఒత్తిడిలేని సుఖసాగరం..
ఆర్ధికపరమైన పేచీలు లేని అన్యోన్య సంసారసూత్రాల ఆధారం..

కాలంతో కలిగిన కలకలం..
పురుషులతో సమానంగా ఆర్థిక చైతన్యం..
స్త్రీ గడపదాటి ముందడుగు వేయడం
ఎంత ఆర్ధిక స్వాతంత్ర్యమున్నా..తప్పని తనవైన ఇంటిబాధ్యతలు
ఏకకాలంలో పలుపాత్రలు పోషించినా
సమాధాన పరచలేని పరిస్థితులు
రాజీకి రాలేని వివాదాలు..విబేధాలు..
సంసార సిద్ధాంతంలో పెనుమార్పులు..
పురుషుడి పక్షపాతానికీ..అహంకారానికీ..
ఆడవారి తెగింపుకీ..సాహసానికి..
విచ్ఛిన్నమౌతున్న వివాహబంధాలు..
అతికించాలని చూసినా వీలుపడని పగిలిన హృదయాలు..

//అనుపల్లవి//

//అనుపల్లవి//

రసప్లావిత హర్షాతిరేక మనోజ్ఞమైన మందిరాన...
సురుచుర సుగంధ సుధాభరిత సల్లాప సమయాన
మధుమోహిత మరందాల వానల..
ఆవిరిదారుల ఊగీ తూగి..
శ్వాసలు దాచిన ప్రణయపు దాహములో..
పూల తెమ్మెరల కలహంస అడుగుల మడుగుల తూచి..
మనసున ఎగిసిన వినీలగగనాల పాలపుంతల
మృదుమంజుల కలకూజిత కలస్వనాలలో..
సరసోత్సవ శుభఘడియల మంగళనాదాలలో
అరమోడ్పుల అలకనంద అధరపాన ఆలింగనంలో..
చెరిపేసిన హద్దుల వలపు ఆనందభైరవి..
రాగరంజిత భావతమస్సులో నీవశమే నేనైతే
తలవంచిన రేయి గడువు..తమకమాపని తనువు గెలుపు..
అనుభూతియై మనసు వీణలు మీటదా..
అనుపల్లవై అనురాగము శృతి చేయదా..!

//నువ్వే విజేత//

//నువ్వే విజేత//

ఇష్టంగా చేసేది ఏన్నడూ కష్టం కాదుగా..
అదే ఆత్మవిశ్వాసమై విజేతగా నిలబెడుతుందిగా
నరనరాల్లో జీర్ణించుకుపోయిన ఆశావాహ దృక్పధం
ఎంతటి అపజయాన్నైనా ఎదుర్కోగలదు..
శ్రమను గుర్తించి ప్రోత్సహించే మంచిమనసులకు కొదవలేనప్పుడు..
పట్టుదలకు స్వయంకృషిని జోడిస్తే చాలుగా..
నిరంతరం కొత్త అంశాలకు పదును పెడుతూ..
కన్నకలలకు సాకారం చేసుకోవాలంటే..
ఊహకందని ప్రణాళికలతో పొరపాట్లను అధిగమించి..
ప్రత్యేకమైన వ్యక్తిత్వంతో ముందుకేగాలి..
అంతిమవిజయాల అలౌకిక స్థితికి..
మానసికంగా సంసిద్ధత కావాలి..
వైఫల్యాలను మన్నించుకొని..
సమస్యను సామరస్యం చేసి అవకాశాన్ని అందిపుచ్చుకోవాలి..

//ఆ నవ్వులో//

//ఆ నవ్వులో//

నిన్న వినబడని సవ్వడేదో..
నాలోని మౌనాన్ని భగ్నం చేస్తూ..
మనసు దాచలేని ఉల్లాసమేదో..
చూపు దాటి గెంతులేస్తూనే ఉంది..
ఒక చెలిమి..
ఒక దూరం..
చేరువైన అనుక్షణం..
అచ్చంగా మనదే కదూ..
ఓయ్...చైతన్యమా..
నా వెన్నెలంతా నీలో దాచుకున్న నిజం..
అబద్ధమైతే కాదు గానీ..
ఇప్పుడైతే..
కెరటమై పొంగింది కేరింత నీ చిన్నారి నవ్వుల నెలవంకలో

//ఇద్దరమే//

నా..నీవు..
జ్ఞాపకాల అరల్లో కానుకలా..
అతి మధురం ఓ మురిపెం..

నీ..నేను...
వసంతయామినిలో రాధికలా..
అభిసారికలా..ప్రియ గీతికలా..
నా..నీవు..
హృదయస్పందనలో వేడుకలా..
మనోల్లాసం..నూతనోత్తేజం..
నీ..నేను
పలుకు తేనెల కోయిలలా..
ఓ చెరుకు తీపిలా..నీ చెక్కెర మోవిలా..
నా..నీవు..
తడియనాటి నవ్వుల నెలవంక..
హద్దులేని ఆకాశాన..అలుపులేని వెన్నెల చారిక..
నీ నేను..
ఎన్నడూ ముగిసిపోని రంగులకలలా..
వాడిపోని భావమాలికలా..వెలిసిపోని వసంతంలా..
నా..నీవు..
పాలపుంతలోని అందంలా..
శారదరాత్రుల విరహంలా..అందని గగనకుసుమంలా..
నీ..నేను...
ఆనందాన్వేషణలో మరీచికలా..
వేసవి మల్లెల వివశంలా...కమ్మని ఊహల గుసగుసలా..

//ఆ నవ్వులో//

నిన్న వినబడని సవ్వడేదో..
నాలోని మౌనాన్ని భగ్నం చేస్తూ..
మనసు దాచలేని ఉల్లాసమేదో..
చూపు దాటి గెంతులేస్తూనే ఉంది..
ఒక చెలిమి..
ఒక దూరం..
చేరువైన అనుక్షణం..
అచ్చంగా మనదే కదూ..
ఓయ్...చైతన్యమా..
నా వెన్నెలంతా నీలో దాచుకున్న నిజం..
అబద్ధమైతే కాదు గానీ..
ఇప్పుడైతే..
కెరటమై పొంగింది కేరింత నీ చిన్నారి నవ్వుల నెలవంకలో..!! 

//వాడు//

వాడికలాగే ఇష్టం..
తనవారిని పొగుడుకొని ఎదుటివారిని తూలనాడటం..
అవసరానికి వచ్చినవారిని చులకన చేయడం..
ఆపై అక్కర్లేని సాయానికి వెళ్ళి భంగపడటం..

వాడికలాగే ఇష్టం...
తనకన్నా ఎత్తున్నవారిని ఎగతాళి చేయడం..
నిండుహృదయాలలో లోపాలను ఎంచడం..
ఆపై మంచితనానికి మసిపూసి ఆనందించడం..

వాడికలాగే ఇష్టం..
ఆడపిల్లని అబ్బురపడుతూనే అపహాస్యం చేయడం..
గిలిగింతల మాటలనుకొని వికృతంగా వాగడం..
ఆపై లోకువై నొచ్చుకోవడం..

వాడికలాగే ఇష్టం...
మాటలవేగంతో మాయ చేయడం..
నైపుణ్యాన్ని గాలమేసి ఆకట్టుకోవడం..
ఆపై బంధానికి బంధీ కాలేనని చేయీవడం..

వాడికలాగే ఇష్టం..
చీకటిని చేరదీసి రోదించడం..
చల్లని జాబిల్లిలో మచ్చలు వెతకడం..
ఆపై కావ్యోద్ధరణంటూ అక్షరాల్ని లాలించడం..!!

 

 

//మనసుపుస్తకం//

పగటికలల ఉనికిని
పెదవంచుకి రంగేసి..
కరిగిన చెమరింపును..
చెక్కిలిపై చారగా ఎండగట్టి..
అతాలాకుతలమైన అంతరంగాన్ని..
ఉగ్గబట్టి ఆపి..
శ్వాసను భారం చేసి..
అంతర్వాణితో అనుసంధానం కాలేని హృదయం
అలోఉకికానందానికి దూరమవుతుంటే..
నిట్టూర్పుల నీరవంలో..
మరణించిన మనిషి జ్ఞాపకంలా..
మిగిలిందొక శూన్యం..
అతీతమైన స్థబ్దత హిమాలయమై ఎదిగిపోగలదని భావించి..
ఒక్క నేనే అనేకమై..
దిగంబరాకాశంలా విస్తరించి..
ఆసక్తిలోనే ఆనందముందన్న నిజాన్ని గ్రహించి..
నిద్దురలేని కళ్ళకు..
వ్యధ నిండిన మనసుకు..
మనసు పుస్తకం బహూకరించాలనుకున్నా..
ఊహను దాటి వాస్తవం ముందుకు నడిపిస్తుంటే..
జీవితాన్నిలా అక్షరబద్దం చేస్తున్నా..!!

//నా నువ్వు//

ఎందులో ఎక్కువని యోచిస్తున్నా..
భావకుడివని అందునా..
నిన్ను మించిన ముగ్ధమైన భావములున్నవిగా నాలో..
కవీంద్రుడివని అందునా..
నువ్వు చూడని రహస్యాలు మిగిలున్నవిగా నాలో..
రసేశ్వరుడివని అందునా..
నవరసాలపుట్టని సైతం పట్టించుకోని వాడివిగా..
చంద్రుడివని అందునా..
నీ అందం వెల్లువలో ప్రవహించేది నా వెన్నెలేగా..
మన్మధుడివని అందునా..
నాలో రహస్యమవుతూనే నలుగురికీ కనిపిస్తున్నావుగా..
తీయనివాడివని అందునా..
నీలో తీపిగోదారై ఉరకలెత్తుతున్నది నేనేగా..
కిలాడి దొంగవందునా..
నా సర్వం దోచి కేవలం ఊహల ఊసే మిగిల్చినందునా..

ఒక్క విషయంలో మాత్రం నువ్వెక్కువని ఒప్పుకుంటున్నా..
నీ మనసును మక్కువకొన్న నా మనసుందిగా నీదగ్గర..
అందుకే నువ్వెక్కువ..
అన్నీ ఉన్నా..మనసు లేని నాకన్నా..!!

 

 

//వాస్తవ స్పర్శ//

అందరూ విడిచిపెట్టేసారని వాపోయి ఏం ప్రయోజనం..
జీవితంలో విలువైన కాలం తిరిగిరాదని తెలిసీ చేజార్చేసాక..
సంతోషానికని అమర్చిన సౌఖ్యాలు..
మితిమీరి మరో ప్రపంచపు అంచుల్ని చూపిస్తే..
పొద్దస్తమానూ తూలిపడుతూ తడబడే చూపులతో..
కన్నవారి కలలన్నీ కామజ్వాలలో ధ్వంసం చేసుకొని..
కట్టుకున్నదాన్ని కాలసర్పానికి విడిచేసి..
ఆమె శోకాన్ని సైతం సొమ్ము చేసుకొని..
కన్నబిడ్డలను గాలికొదిలేసి..
వారి భవిష్యత్తును నిర్దాక్షిణ్యంగా చిదిమేసి..
దుర్వ్యసనాలకు చిక్కి..రోగాలకు సిగ్గును తాకట్టు పెట్టి..
ఆరోగ్యంతో పాటు దిగజారిపోతున్న విలువలను పైకెత్తలేక..
బాగుపడలేదని లోకం నిందిస్తుందనుకుంటే ఏం లాభం..
అహంకారంతో జీవితాన్ని పూర్తిగా నాశనం చేసుకున్నాక..
ఓడిపోయిన నిస్సహాయతకు నక్కవినయాల ముసుగేస్తూ..
వాస్తవానికి ఎవరిని మోసం చేసాననుకుంటున్నాడో..
తనకు తానే బలైపోతున్న మతిలేని మృగంలా వాడు..!!

 

 

//కార్తీక వెన్నెల్లు//

మంచుబిందువులను రాల్చుతోంది వెన్నెల..
హేమంతానికి తొందరపడ్డట్టుగా..
మనసు పలికే మౌనగీతమేదో ఎదలో రేగుతుంటే..
ఆపసోపాలు పడుతున్న విరహం నిట్టూర్చింది..
తెల్లని పాలవెన్నెల నురుగులా జారుతుంటే..
పరిమళ నెత్తావులకు తాపం ఎగిసిపడుతుంది..
అరమోడ్పులైన కన్నులు సిగ్గుతెరలను మూసేస్తుంటే..
చూపులకందని ఆర్ద్రత వెల్లువయ్యింది..
ఎగిసే ముంగురులు అల్లన మోమును దాచేస్తుంటే..
గతంలో నీ అరచేతి స్పర్శ తనలోకి లాకెళ్ళినట్లుంది..
చెదిరిన కలలన్నింటినీ పోగేసి పొదుపుకుంటున్నానందుకే..
నా మౌనాన్ని నీ ధ్యానంతో అనుభూతించాలని..
నీ తలపుతో నన్ను నేను నింపుకుంటున్నా..
మన ప్రేమసుధాసారాన్ని ఆకాశపందిరిలో ఆస్వాదించాలనే..!!

//ఊహల కోయిల//

వెదికానప్పుడో వసంతాన్ని..
అందరాని కొమ్మల్లోకి చూపుని సారించి..
నా ఊహలోని కోయిలలు..
రంగులద్దుకొని రాగాలు తీసినట్లు కనిపిస్తుంటే..
మౌనపంజరాన్ని వీడిన మనసు..
రెక్కలు విప్పుకొని తానే ఓ కూజితమై కూసింది..
విరహంలో నా మనసుతడి..
నీ చూపును చెమరించినట్లు..
నన్నో పూలజల్లుగా తడిమింది..
ఆస్వాదించే చోటు..
నీ తలపుదేనని తలచిన చకోరి సొగసు.
వాయులీనమై చిలిపిదనాన్ని చేరదీసింది..
అప్పుడే వగలు కురిసిందో భావవీచిక..
గ్రీష్మంలో వసంతగీతాన్ని ఆలపిస్తానంటూ..
అమరగీతమైన నాలో ఆనందమొకటి..
గగనమెగిసింది అనురాగ సల్లాపమై..!!

//మైత్రీబంధం//

అమాసలంటని అసమానకాంతి..
అమృతక్షణాల వసంతగీతి..
వేకువకుంకుమల మధురానుభూతి..
విరిసుగంధాల మరందాలతీపి..
ఆలిబిల్లి ఆశల ఆలింగనరీతి..
మానసవీణ మలహరసంగీతి..
విరహపుశ్వాసల వెచ్చనిరాత్రి..
సల్లాపమాధుర్య ప్రణయశృతి..
ప్రవహించు నిత్యమై జీవనది..
సుగమమే ప్రయాణం నవ్వులచెలిమది..:)

//వేకువ కల//

పురివిప్పిన సంతోషతరంగాలలో..
అపరిమితమైన అనురాగం వెల్లువై ఎగసిన క్షణాన..
అదృశ్యమైన నక్షత్రమేదో రాలిపడి..

కోరిక కోరమన్నట్లు..
నిను నాలో దాచుకున్న ఆనంద పారవశ్యం..
ఈ క్షణాలనిలాగే శాశ్వతం చేయమని వేడినట్లు..
తధాస్తన్న తారలు చేయి కలిపి నృత్యాన్ని చేసినట్లు..
చిరునవ్వుల మిణుకులతోనే నన్ను దీవించినట్లు..
రసమయ కాంతిధారల కిరణాలలో నే తడిచినట్లు..
తాము దాచుకున్న పరిమళమంతా నాకర్పించినట్లు..
చిరుగాలుల తరంగాలకి విరినై నేనూగినట్లు..
ప్రకృతిలోని రాగాలన్నీ నాలోకొచ్చి చేరినట్లు..
చెక్కిట రాలిన వెచ్చని చెమరింపు తీపైనట్లు..
నిన్ను ప్రేమించేందుకు నాలో రసజ్ఞత నింపినట్లు..
ఇదంతా తెలివేకువ కలంటే నమ్మలేనట్లు..

//విరహాల వేకువ//

స్వర్గానికీ నరకానికీ మధ్య ఊగిసలాటేగా జీవితం..
గ్రీష్మర్తుల వేసవిగాలికి ఎద ఉక్కిరిబిక్కిరవుతుంటే..
చెదిరిన హృదయాన్ని చీకటినే దాచుకున్నా..
ఆశలు తీర్చలేని ఏకాంతం అసహాయమై కదులుతుంటే..
పసిడి వేకువులను కలవరించాయి కన్నులు..
ఉలిక్కిపడు ఊహలు కలలోనే కరిగిపోయాక..
గుండెల్లో నీవున్నావని గొంతెత్తి పాడుకున్నా..
నీకై చూస్తున్న క్షణాలు బరువై నిలబడిపోతే..
పువ్వుల గుసగుసలపై మోహాన్ని పెంచుకున్నా..
ఊపిరి గలగలలు ప్రేమలేఖలై వెలుగుతుంటే..
వెన్నెల సందేశం మౌనంగా చదువుకున్నా.. 
గడుసరి విరహం మువ్వై మోగుతుంటే..
పొంచి ఉన్న మధుమాసాన్ని ఆదరించా..
ఆమని దరహాసమేదో పెదవులపై విచ్చుకుంటే..   

//తిరస్కృతి//

//తిరస్కృతి//

ఎంత వేదనో కదా తిరస్కృతి..
ఇన్నాళ్ళూ ఒంటరితనమే వేధించినదనుకున్నది..
నేడు ఆత్మన్యునతగా అవతరించి భూతమై భయపెడుతుంటే..
సహజమైన సహేతుక ఆలోచనలన్నీ అల్పమై తేలిపోతుంటే..
నిరాశ మితిమీరి మనస్తాపమై శోకిస్తుంటే వింతేముంది..
అత్యుత్తమమైనది..శాశ్వతమైనదిగా భావించిన ప్రేమ..
సంకేళ్ళువీడి సునాయాసంగా అనుబంధాన్ని తెంపుకుపోతుంటే..
పరిమితులు దాటిన దుఃఖం దీర్ఘమై కమ్ముకుంటుంటే..
కళ్ళవెంబడి అశృవులు అనంతమై ప్రవహించడంలో ఆశ్చర్యమేముంది..
దారితప్పిన ఎడారిలోయల్లో జీవితం తారాడుతుంటే..
ఏకాంతవాసంలో రోదిస్తున్న అంతరంగం మేఘావృతమవుతుంటే
నీలినీడల నిర్లక్ష్యాలు తృణీకరించిన క్షణాలు బహిర్గతమవుతుంటే..
స్వేచ్ఛగా సంచరించలేని నిశ్శబ్దం నిర్జనమై వెక్కిరిస్తుంటే విడ్డూరమేముంది..
అధిగమించలేని ఆవేదన అవగాహనారాహిత్యాన్ని పరిహసిస్తుంటే..
అజ్ఞానపు వ్యామోహం విషబీజాలను కత్తిరించలేకపోతుంటే..
కష్టమైనా సరే..
తిరస్కృతిని తిరస్కరించడం నేర్వాలి..
హృదయంలో ప్రేమకు పునరంకురార్పణ జరగాలి..
ప్రాణాన్ని జ్వాలగా చేసి మరిన్ని జీవితాలు వెలిగించాలి..!!

//నేనే కదా//

//నేనే కదా//

హృద్గుహ నిండా అంధకారం..
చందమామవై అల్లంతదూరాన నీవున్నందుకు కదా..
ఎండిపోయిన మందహాసం..
నువ్వొస్తానని మాటిచ్చి రాలేకపోయినందుకే కదా
ఎదురుగా ఎందరున్నా..
మదిలో దిగులుమేఘాలు కమ్ముకున్నది నిజమే కదా
కన్నుల ముందర ఎందరున్నా
నా కన్నులపండుగ నీవెదురైనప్పుడే కదా..
గంభీర నిశ్శబ్దంలో కూరుకున్నా..
నీ నిరంతరానందం నేనేనని తెలుసు కదా..
నువ్వెక్కడ సంచరిస్తున్నా..
నీ రసమయ జగత్తు నేనే కదా..!!

//కేరింత//

//కేరింత//

మనసున పెనవేసిన మల్లెతీవెలై నీ తలపులు..
బుగ్గ నునుపున సిగ్గు చివురులను పోగేస్తుంటే..
చెక్కిట్లో సింగారాలు సల్లాప రాయబారాలు
వలపును పచ్చగా మోముకే పూసేస్తుంటే..
వసంత రాగవీధుల్లో స్వరాల సంగీతాలు..
ఎద సందడిలో చేరి వసంతకోయిలనే మరిపిస్తుంటే..
కెరటంలా పొంగిన హృదిలోని కేరింత
మాటలన్నీ చందమామ కవితలుగా రాసుకుంటుంటే..
తేనెమేఘమై కురిసిందనుకున్నా నీ ప్రేమ..
నవపల్లవాల్లో సంధ్యారాగాన్ని ప్రణయకావ్యం చేసేస్తూ..
నీది కానిదేదీ లేదన్న తనువు బంధమవుతానంటుంటే..
కలకాలం చైత్రమైపోనా నువ్వెదురుచూసే పున్నమిలోనే..!!

//విస్మయ//

//విస్మయ//

మహామౌనంలో కూరుకుపోయిందామె..
మళ్ళీ మళ్ళీ మోసపోయినందుకు..
ప్రేమించడం తప్ప మరొకటి అతనికి చేతకాదని నమ్మినందుకు..
మనసు చేసే ఇంద్రజాలంలో ఒక్కసారి చపలత్వానికి పట్టుబడ్డందుకు..
గాయపడ్డ మనసు రహస్యంగా రోదిస్తుంటే ఓదార్చలేక..
అశృవులతోనూ అంతరాత్మను క్షాళన చేసుకోలేక..
గుండెలోని వేదన ఆకాశంలో జ్వాలగా ఎగిసిపడుతుంటే..
చింతాక్రాంతమైన అంతరంగాన్ని ఆపలేక..
కంపిస్తున్న హృదయంలో విశ్వాసాన్ని నింపలేక..
చిరుగాలికి రెపరెపలాడుతున్న దివ్వెలా
నిలకడలేని క్షణంలోని పక్షిలా..
విలవిలలాడుతున్న విషాదంలా..
నిట్టూర్పులతోనే జీవితంలో వెలితిని నింపుకునేందుకు ప్రయత్నిస్తున్న విస్మయ..!!

// నీ నేను //

//నీ నేను//

కాగితంలా మారిపోయా..కవిత్వంగా నన్ను రాసుకుంటానన్నావని..
కలలా కానుకయ్యా..నీలో ఊహలు మొలకెత్తాలని..
వెన్నెలనై విందుచేసా..మనసులో వెలితి నింపాలని..
విరిలా విచ్చుకున్నా..మందహాసంతో నీలో స్పూర్తి నింపాలని..
అనుపల్లవినై రవళించా..సంగీతాన్ని నీకు పరిచయించాలని..
మేఘమై వర్షించా..నీలో ఆనందాలు కురవాలని..
కలకోయిలగా మారిపోయా..నీకు వసంతం మాత్రమే వినబడాలని..
ఊహలో ఊసునయ్యా_నీ ఒంటరిభావాలకు తోడవ్వాలని..
చివరకు..
నీ నిశ్శబ్దంలో చేరిపోయా..నీకు మౌనంపై మనసయ్యిందని..
వెన్నెల మరకై మిగిలిపోయా..నీ జ్ఞాపకాలకు నెత్తావులద్దాలని..
అయినా...
ఇంకేదో కాలేకపోయానంటావు..నీలోని నన్ను తడుముకోకుండానే..!!

//జీవన రహస్యం//

//జీవన రహస్యం//

వెలసిపోయిన అనుబంధమొకటి..అనుమానపు కోరల రక్కుళ్ళతో
రోదనతో మొదలై వేదన రుధిరప్రవాహమై అణువణువూ ప్రవహిస్తుంటే..
హృదయాంతరాలలో ఏదో ప్రళయం..

సువిశాలం కాని బుద్ధి సందేహంతో సతమతమవుతుంటే..
విముక్తి కాలేని వివాదమేదో వికటాట్టహాసం చేస్తుంటే..
అంతరంగంలో ఏవో నీలినీడలు..

నిశ్శబ్దగతుల నిశీధికి పట్టుబడిన పరాజితలా..
గ్రీష్మర్తుల్లోని జ్వాలలకు తప్పించుకోలేని ఎండుపుల్లలా
ఆకాశానికెగిసిన అపశృతులలో..

రాలిపోయిన కుసుమం అగాధ పాతాళగర్భంలో జారినట్లు..
కన్నీటి చీకట్లలో ఆశానౌక మునిగిపోయినట్లు..
.ఒక జీవనరహస్యం అడుగంటిపోయింది...!!

//పచ్చదనపు హొయలు//

//పచ్చదనపు హొయలు//

నిద్దురలేచిన భావుకత్వమేదో..నిన్న లేని అందంలా నాలో..
పచ్చని కోక కట్టిన ప్రకృతి..మనసుని మహేంద్రజాలం చేసేస్తుంటే..
వెండిమబ్బులు వెన్నముద్దల్లా జరిగి..మనసు కరిగిస్తుంటే..
గాలికి ఊగే కొమ్మలు ఊపిరి సలపనివ్వని అందాలతో మైమరపిస్తుంటే..
వికసించిన సరోజాల్లో మేల్కొన్న మధురస్వప్నాన్ని నెమరేస్తుంటే..
దిగులుపడ్డ లక్ష్యాలు సైతం చైతన్యమై శ్వాస తీసుకోవా..
ఆనందాన్వేషణ సిద్ధించిన కన్నుల్లో జీవం తిరిగిరాదా..
పాదాల్లో పద్మరాగాలు ఉదయించి పరుగులెత్తి విహరించవా
రెక్కలొచ్చిన మది రెప్పలవాకిలి దాటి..నింగికెగిసి..
చిరునవ్వును తరంగం చేసి..
సరికొత్తగా పల్లవించే పాటనేదో గానం చేసి..
ఉషోదయపు ఉజ్వలకాంటిలో రసడోలలూగించదా..
అరమోడ్పుల ఆమని ఆరాటానికై కోయిల కూజితమవ్వదా..
మరలిపోతున్న కలలు..పదాల పొందుతో మరువాల వాన చిలికించవా..!!

//మనోచింతిత//

//మనోచింతిత//

పచ్చగా మెరిసిందేమో మోము..
పరసువేదితో పోల్చి నన్ను పలకరించినప్పుడు..
చిట్లించి చూసిన కన్నుల్లో ఏమి చదివావో..
ఎంతమంది ప్రియతములను బంగారమంటూ పిలిచినా..
నప్పింది మాత్రం నీకేనంటూ చిలిపిగా నవ్వడం గుర్తుంది..

బంగారమంటే విలువైన లోహంగా భావించే నేను..
మౌనంగానే మనసుకు మెరుగుపెట్టాను..నీ మాటలు మంత్రమేసినట్లు..
కురిపించిన నీ ప్రేమజల్లులో పులకించి స్వచ్ఛమయ్యాను..
చిన్నిచిన్ని ఆశలు అంకురించడం చూసి ఆనందించాను..
కలనైతే కానంటూ కమ్మని కానుకయ్యావు..
గమ్యమెరిగిన మనసు నీవైపు అడుగులేస్తుంటే సహకరించాను..
నాలో ఉన్న ప్రాణాన్ని నీ చేతికిచ్చాక..నా నవ్వు భద్రం చేస్తానంటూ దోచుకేళ్ళావు..
అదిగో..అప్పటినుండే..
కాలం కదలనని మొరాయించింది..

తీయని బాధని తలపోయలేకున్నా విరహాన్ని.. నువ్వలా గుర్తుకొస్తుంటే..
నిద్దుర కరువైన రాత్రులను తిట్టుకుంటున్నా.. నీ అల్లర్లు తెల్లార్లూ గిల్లుతుంటే..
పరిమళించే ప్రతిపవనాన్నీ అన్వేషిస్తున్నా..నీ గంధాన్ని పూసుకొచ్చిందేమోనని..
ఎగిరే చిగురాకు చప్పుళ్ళకీ ఉరకలేస్తున్నా..నీ కబురు తెచ్చిందేమోనని..
రోజంతా నీ ఆలోచనతోనే అలసిపోతున్నా..నీ జాడ తెలియట్లేదని..
ఇప్పుడంతా అభావమైంది నా మోము..
నీరెండ రహస్యమేదో ముసుగేసుకున్న ఆకాశంలా..

//హృదయాల మేలుకలయిక//

//హృదయాల మేలుకలయిక//

ఆనందభైరవి అభిషేకించినట్లు హృదయాన్ని స్పృశిస్తుంటే..
పునర్జీవినైనట్లుంది..
అప్పుడెప్పుడో నాకు నేస్తమైన విరహం..
చెప్పకుండా ఎటో మరలిపోయినట్లుంది నిన్ను నాకిచ్చి..
వికసించిన పూలవనమంటి నీ సాన్నిధ్యంలో..
పుప్పొడినై రాలిపోయినా ఫరవాలేదనిపిస్తుంది..
నవ్వులు నురగలై నన్ను శృతి చేస్తుంటే..
సంగీత సందేశమేదో నీకు వినిపించాలనిపిస్తోంది..
గుండెలో పుట్టిన ప్రేమ అనంతమవుతుంటే..
లతనై అల్లుకుపోవడం మాత్రమే తెలుస్తోంది..
సడి చేయని సంతోషమేదో గుసగుసలాడుతుంటే..
ఈ క్షణమిలాగే ఆగిపోతే బాగుండుననిపిస్తోంది..!!

//మమేకం//

//మమేకం//

తొలిచూపుకి చిగురించిన చొరవ ఆలింగనంలో గగనమవగా
తరువూ తనువూ వెన్నెలై విరబూసిన తరుణాన
నువ్వూ నేనూ మమేకమై..నీవుగా నాలో కరిగి..ఒక్కటిగా మిగిలాక
మన ప్రేమ పాపగా మారిన వైనం..
మనసుకు మాత్రమే తెలిసిన మధురభావం
నీ పాపను మోస్తూ బరువెక్కిన అందాలు..
పొంగుతున్న ఆనందానిక్ ప్రతీకలు
ఉక్కిరిబిక్కిరి చేసిన వేవిళ్ళు..కోరెను పుల్లని మావిళ్ళు
అరవిరిసిన ముద్దబంతి సౌందర్యం ముగ్ధత్వాన్ని నాకాపాదించగా
అలసటకూడా అందమై మెరిసింది నీ ఆత్మీయస్పర్శలో..
అణువణువూ అమ్మతనం నిండిన మాధుర్యం
అనుభవిస్తేగానీ తెలియని అనిర్వచనీయ పరవశం

//అట్ల తద్దె//

//అట్ల తద్దె//

తొలిపొద్దు వేకువలో విరబూసిన అందాలు...
కొమ్మకొమ్మకో' కువకువలు..
నవ్వులూ..కేరింతలతో వనమంతా నిండింది..
కాంతి తరంగాలతో తేలియాడుతున్నా జాబిల్లి..
ఇన్ని అందాలను ఒక్కమారు చూసి కరిగినట్లుంది..
ఆకాశంలో నిద్దురమబ్బులు తూగుతూన్నా
ఆనందం పరుగు తీస్తుంది పావడా కట్టి
ఓణీలో ఒదిగిన ఒయ్యారమంతా మువ్వలతో కలిసి శబ్దించినట్లు..
నిశ్శబ్ద తారకలు నిద్దురలేచి తొంగిచూసెను దొంగచూపులు..

చెలికాని నవ్వులోని కుంకుమపువ్వులు చేతిలో గోరింతపూతలైనట్లు..
అరచేతి చందమామను ముద్దాడాలాడనే కొంటెకోరికలు
దోబూచులాటలూ...ఉప్పులకుప్పలూ..
తూగుటుయ్యాలలూ..తొక్కుడుబిళ్ళలూ..
వసుంధరా సందడిని మరింత పెంచేస్తుంటే
వెన్నెల దరహాసంతోనే సూర్యోదయమయ్యింది..
రోజంతా కలలు నిండిన కన్నులను రెప్పవేయనీయక
ఊహల వలకాడ్ని వరుడ్ని చేయమని..
నోముకు తొండరపడుతున్న తుంటరి తలపులు..!!

//దిగులు ముత్యం//

//దిగులు ముత్యం//

అదిరే పెదవుల గుసగుసలను చదివే ఆరాటమేదో నాలో..
మౌనరాగాన్ని పెనవేసుకున్న మౌనిలా నీవుంటే..
అనురాగాల కోయిలనై అలరించాలనుకున్నా నిన్ను..
సద్దులేని సంగీతంలా నీరవరమై నిల్చుంటే..
కలలో కలబోసుకున్న కబురులన్నీ కలిపి కట్టకట్టా
రవ్వంత కనికరంలేని నిన్ను కనికట్టు చేద్దామని...
మధురోహల దోసిలిలో నీ మాటలముత్యాలను ఏరుకోవాలనుకున్నా
అనంతమైన ఆకాశాన్ని ఆలకించడమాపి అలంకృతమైన నన్నాలపిస్తావని..
చూసి చూసి కంటి నరాలు వదులయ్యాయి..
దిగులు ముత్యమై రాలింది..
నిన్నాకట్టుకోలేని నా ఆకతాయితనం..
అమాయకమై కరిగింది..!!

//శరత్కాలపు వెన్నెల//

//శరత్కాలపు వెన్నెల//

కుంకుమ వన్నెలన్నీ వడగట్టి ధవళ మందహాసం చేస్తోంది రేయి..
మెరుపు అలలు కొన్ని వెల్లువలై పొంగిపొరలుతుంటే..
కురుస్తోంది వెన్నెలవాన నా మదిలో విరిసిన పువ్వులబంతిలా..
చిరు చలిగాలి దోబూచులాడి గిలిగింతల కిలికించితాలు రేపుతుంటే..
శరత్కాలపు చంద్రోదయంపైనే మనసయ్యింది..
పున్నాగుల పలకరింతలకి మేను పులకరిస్తుంటే
వెండిమబ్బు విహారానికి చేయిచాచి రమ్మని పిలుస్తున్నట్లుంది..
చకోరపక్షుల కూజితాలకి చంద్రశిలలు కరుగుతుంటే..
ఆనందభైరవి రాగమేదో పెదవులపై తారాడుతోంది..
మనసు తీయని తాపానికి తూట్లవుతుంటే..
మన్మధుని ఐదుబాణాలు నాకే గురిపెట్టినట్లుంది..
మనసు మరోలోకంలో జంటగా విహరిస్తుంటే..
ఏకాంతమిప్పుడు తీపవుతోంది

//ముద్దులబాబు//

//ముద్దులబాబు//

నవ్వుల నగుమోము కదా నీవు..చిరునవ్వులతోనే నన్ను దోచేస్తూ..
నీ చిన్నారిమోముకెన్ని కవళికలో..గిలిగింతలకానుకలతో మనసు కట్టేస్తూ..
మరెన్ని కేరింతలో నీ పొన్నారిమోవిలో..రవ్వంతరాగాలూ రాలుగాయి సవ్వడులైపోతూ..
ఎన్ని చిట్టిస్వరాలో నీ గారాలగొంతులో..ఒయ్యరిగమకాలకే దీర్ఘాలు నేర్పిస్తూ..
పాలుగారు పసిడివన్నె బుగ్గలు..తనివి తీరని ముద్దులు నీకిమ్మంటూ..
సన్నజాజిరేకుల్లోని సున్నితత్వమేమో నీవు..నునులేత స్పర్శలోని మాధుర్యాన్ని నాకందిస్తూ..
నిద్దురలోనూ అరవిరిసే పెదవి పగడాలు..నన్ను రెప్పవేయక దోసిలిపట్టమంటూ..
ఏ గంధం పూసుకు పుట్టినందుకో..వ్యాపించిన సువర్ణపరిమళాలు మనసు నట్టింట్లో..
మాటలకందని నీ చిలిపి అల్లర్లు..మళ్ళీమళ్ళీ నన్ను మైమరపుకు గురిచేస్తూ.

//ఉత్తేజం//

//ఉత్తేజం//

ఆకుల గలగలలోనూ విషాదం వినబడుతోంది
దారితప్పిన వసంతాన్ని అన్వేషించి అలసినందుకేమో..
కొత్త ఉద్వేగానికి మేల్కొల్పులేవో..
అనుభవాన్ని రేపటి ఉత్సాహంగా మార్చుకోమని చొరవచేస్తుంటే..
మనసుకున్న అభిరుచిని మన్నించి పొదుపుకున్నా.
సాహిత్యేతర సృజన తనవల్ల కాదంటుంటే..
ఊహల ప్రపంచాన్ని సృష్టించుకున్నా
సజీవమైనదేదీ లోకంలో లేదని స్పష్టమయ్యాక..
ఆరుఋతువులూ ఒకేరీతిగా అగుపిస్తున్నాయక్కడ
కోరిన బంగారులోకం పచ్చగా కళకళలాడుతుంటే..
ఏకాంతభావాలేవీ మిగల్లేదక్కడ..
నవ్యానుభవం మౌనరాగాన్ని ఓడించి సంకీర్తనావళిని మొదలెట్టాక.

//మార్పు//

//మార్పు//

జీవితంలో మార్పు..
అనివార్యమని తెలుసందరికీ..
కాలానుగుణమైన మార్పు.
అత్యంత అవసరం కూడా
మార్పును చంచలస్వభావ సూచికగా కాక..
ఆశావాహ ధృక్పధంతో స్వీకరించడం రావాలి...
మార్పును వ్యతిరేకించమని ప్రగల్భాలు పలికేవారు సైతం..
తమదాక వస్తే నిన్నటిగాలి పీల్చేందుకే మొగ్గుచూపుతారెందుకో...
ఒక సహజమైన మార్పు..
జీవితాన్ని కొత్తపుంతలు తొక్కిస్తుందని తెలిసినా
సమయానికి అందిపుచ్చుకోకుంటే.
మిగిలేది అసంతృప్తేగా..

విచ్ఛిన్నం కావా..అల్పజ్ఞుల విరుపుమాటల విచ్చుకత్తులు..
మనం స్వాగతించిన చిన్న మార్పుతోనే..
మనసు తెరిచి ఒక్కమారు మార్పును స్పృశిస్తే తెలుస్తుంది కదా..
స్వల్పమైన సత్యంలో ఎంత నిర్మలానందం దాగుందో...
శూన్యాకాశంలో తారకలెన్ని మెరుపులతో ప్రకాశిస్తున్నవో..
ఎండుటాకుల గలగలలో ఎన్ని సరిగమలు విలీనమయ్యాయో..
సద్దులేని హృదయంలో..ప్రేమైక రాగమెన్ని సంతోషపు గుసగుసలు వినిపిస్తుందో..
నిన్నటి విషాడమౌనంలో..పల్లవించు చిరునవ్వు ఎన్ని కొత్త ఆశలు నింపుతుందో..
ఎదురుచూడొద్దు ఇతరుల్లో మార్పుకోసం..
మొదట మనం మారి చూద్దాం..
ఇతరులకదే కనుపంట చేద్దాం..!!

//మనసు//

//మనసు//

విరహంపోరు పడలేని అందాలు అలుకలకు తెరతీసిన వైనం
విరిచిన పెదవొంపు పెరపెరలో నటియించమంది మనసు
వలపు సెగలకు పుట్టిని చెమట బిందువులు జార
కరిగిన కస్తూరిబొట్టును సవరించమంది మనసు..

పాలకుండలా వెలుగుతున్న వెచ్చని వెన్నెలసోన
పచ్చని చెక్కిట గంథముగా అలదమంది మనసు..
కాటుకపిట్టల పోలిన కన్నుల నలుపును కొనగోట తీసి..
సొట్టపడ్డ చుబుకాన దిద్దమంది మనసు..

మంచిముత్యామంటి మధురభావాల చల్లని దండ గుచ్చి
మృదువైన కంఠసీమను అలంకరించమంది మనసు..
నునుపైన బాహువులను కైదండగా మార్చి..
మనసైన ఆలింగనపు స్పర్శానుభవం ఇవ్వమంది మనసు..

తనూలావణ్యమంతా అక్షర సోయగంలో కూర్చి..
మొలకెత్తిన వివశాన్ని రాయమంది మనసు.
ఆకాశాన్ని పత్రంగా మలచి...చుక్కలనే అక్షరాలుగా పేర్చి..
అల్లిబిల్లి ఆశలన్నీ తనకు చేరవేయమంది మనసు..!!

//రసార్ణవం//

//రసార్ణవం//

ఆనందం రెక్కలు విప్పుకోవడం తెలుస్తోంది
ఆకాశమాలపించిన అరుణరాగమేదో అధరాలను చేరి.,.
అలలు అలలుగా..
అలతి పదాలుగా..
అల్లిబిల్లి అందాలుగా
అరవిరిసినట్లు అనంతమై
దివారాత్రుల రసాన్వేషణ ఫలమై కలస్వనమై..
హృదయాచ్ఛాదిత అంధకారాన్ని తరిమికొడుతూ..
నిశ్వసించిన శ్వాసను సైతం దోసిలిపట్టి
కవితగా కూర్చుకుంటుంటే..
నిన్నటిదాకా అభిముఖమైన విషాదం
పరాభవమైనట్లు నీరవంలోకి జారిపోతుంటే..
తుంటరితనం తాండవిస్తోంది..
తడబడిన థిల్లానా తప్పటడుగులేసినట్లు..
మౌనాన్ని ఉల్లాసంగా శృతిచేసినట్టుంది..
జీవనతంత్రులను సరికొత్తగా మీటినట్లు..!!

//మాటే మంత్రము//

//మాటే మంత్రము//

మనిషికి మాత్రమే ఉన్న అద్భుతవరం కదా 'మాట'..
అందుకే మనం మాట్లాడాలి..
మాటలు కలపడం నేర్చుకోవాలి..
అర్ధవంతమైన మాటలు మానవసంబంధాలను పతిష్టం చేస్తాయి..
మాటల్ని బట్టేగా మనిషిని అంచనా వేసేది..
అపార్ధాలకు తావివ్వలేని మాటలను ఉపయోగించడం ఎంతో అవసరం
అడ్డుగోడగా ఉన్న అనేక ఒత్తిళ్ళు, విభేదాలు..
సక్రమంగా మాట్లాడి దూరం చేసుకోవచ్చుగా..
మెప్పించినా..నొప్పించినా మాటలతోనేగా బంధాలు..
మనసుకు దగ్గరతనాలు..
అయినా చాల తక్కువమందితోనేగా మనసువిప్పి మాట్లాడేది..
అభివ్యక్తీకరించలేని మాటలు మనసులో ఎన్నున్నా వ్యర్ధమేగా..
మాట తీరు బాలేదనో.. నచ్చేలా మాట్లాడలేదనో..
మౌనాన్ని ఆశ్రయిస్తే చివరికి మిగిలేది ఒంటరితనమేగా..
కొన్నిసార్లు ఎదుటివారి మాటలను బట్టీ స్పందించడంలో తప్పులేకున్నా..
సూటిగా ఎదలో భావం చెప్పి బరువు దించుకోవచ్చుగా..
సందర్భాన్ని బట్టీ పలికే విలువైన మాటలు..
మంత్రమై మనసును పెనవేయునుగా..
ఇంద్రజాలమై మురిపించునుగా..!!

//పునర్జీవిత//

//పునర్జీవిత//

ఆపాదమస్తకం కంపిస్తోంది ఆమెకి...
అమాసలో దారి కరువైనట్లు ..
స్మశానవైరాగ్యమేదో చుట్టుముట్టి..
గాఢాంధకారంలో నెట్టేసినట్లు..
మనసులోని మర్మరధ్వనులు అస్తవ్యస్తమై..
హృదయ దిగాంచలాల్లో ఏదో పాట సన్నగా వినబడుతూ
విషాద గీతమో..చరమ గీతమో తేల్చుకోలేని సందిగ్ధంలో..
నిద్రాణమైన స్వేచ్ఛను కోరినట్లనిపించి మదిలో..
చిరుస్వప్నాన్ని వాస్తవం చేసుకోవాలనే ఆకాంక్షలో..

ఒక ఊహ ఫలించిందామె ప్రయత్నంలో..
ఉదయించిన ఉషోదయపు ఉజ్జ్వలకాంతి..
హృదయతంత్రులను సుతారంగా మీటి
అమృతకిరణాలను తాకించి..
అలసిపోయిన జీవితాన్ని మేల్కొల్పమంటూ..
రాలిపోయిన క్షణాలపై కళ్ళాపి జల్లి..
చంకీ ముగ్గుల బంగారు కాంతులను కలబోయమంటూ
చూపు ప్రసరించగలిగితే..
పెనుచీకటి వెనుక వెలుతురుంటుందనే నిజాన్ని విప్పి చెప్తూ..
పునర్జీవితానికి ఉత్తేజమవమని సందేశమేదో అందిస్తుంటే..
అంతరాత్మ శాంతించిందట స్వస్థత చేకూరినట్లు..!!

//వెన్నెల మంట//

//వెన్నెల మంట//

ఈ రేయెందుకో..
నిట్టూర్పుల గాడ్పులే మనసంతా..

చంద్రకాంత శిలలు సైతం కరిగే చల్లనివేళ
నా హృదిని మాత్రం తాపముతో రగిలిస్తూ..

చిరుగాలి అలల మెత్తని తాకిడికేమో..
కన్నులు తెరిచే ఆహ్వానిస్తున్న ఊహాలోకానికి ఎగిరిపోతూ..

మనసు దాచుకున్న మౌనరహస్యాలెన్నో..
పెదవుల్లో నెలవంకలై ఒయారంగా ఒదిగిపోతూ..

తేలియాడొచ్చే సురపొన్నల సుగంధాలకే..
సల్లాప మైకమేదో ప్రేమమీర కమ్ముకుపోతూ..

ఎదలో ఎగిసే సురుచిర ప్రణయభావాలన్నీ..
మన్మధుని పుష్పబాణావళికే కందిపోతూ..

వసంతహేలను సృష్టిస్తాయనుకున్న నీ తలపులు..
నేడు పూర్ణ చంద్రోదయానికి మరింత విరహాన్ని పెంచేస్తూ..!!

//హృదయావేదన//

//హృదయావేదన//

ఆమె హృదయం నినాదం చేస్తోంది..
ఓడిపోయిన నక్షత్రాల్లో తనను చేర్చొద్దంటూ..
అజ్ఞాత నిశ్శబ్ద శబ్దాల్లో ఒక్కమారు తనను వినమంటూ..
తనకున్న కాస్త స్వేచ్ఛను అతనికర్పిస్తానంటూ..
ఆమెలోని ప్రేమను అతనికి ధూపమేస్తానంటూ..
ఏకాంతపు నవ్యత్వంలోని చెలిమిని రుచి చూపుతానంటూ..
ఆర్ద్రత నిండిన కన్నీటితో అభిషేకిస్తూ..
నిర్జీవమైన ఎడారిలో ఒక్కమారు మొలకెత్తనివ్వమంటూ..
పరాయివాడుగా మారి కనికరం చూపని కసాయిలా వాడు నడిచెళ్ళిపోతుంటే..!

//రాతిరి రాగం//

//రాతిరి రాగం//

రాతిరి రంజుగా మారింది..
కురిసిన జాజులు జూకాలై మనసును తోడుగా ఊపుతుంటే..
చేరువైన దూరాన్ని ఆలిగనంతో బంధించి..
అలసిన కన్నుల ఎర్రదనానికి వేడుక పూసి..
చేరువైన నీ చెలిమి సన్నిధిలో..
చిలికిన వెన్నెల సోయగాన్ని పోదిచేసి...
గుసగుసలాడుతున్న పెదవుల ఊసులను ఆపలేక..
వివశమవుతున్న మదిని బుజ్జగించి..
ముద్దు తీరని మోహానికి రంగులేసి..
హద్దులెరుగని ప్రేమను కానుకిచ్చి..
మొన్నటి కలలన్నింటినీ కవితలుగా అల్లి..
నీ చిరుతనవ్వులకే అంకితమిస్తున్నా

//నీ తలపు//

//నీ తలపు//

చిటపట పువ్వులే పెదవుల్లో..
రోహిణికార్తెలో శీతలసమీరంలా నీ వలపుగాలి సోకుతుంటే..
సిగ్గుల సొట్టలే పాలబుగ్గల్లో
సస్మితవదనాన్ని అనిమేషమై తిలకించడం గుర్తొస్తుంటే..
ఆనందరసార్ణవమే కాటుక కన్నుల్లో..
ప్రేమసుధా సారాన్ని హృదయంలో ఆస్వాదిస్తుంటే..
మౌనాన్ని సైతం అనుభూతిస్తున్నా..
మనసైన నీ జ్ఞాపకాల నెత్తావులు మత్తెక్కిస్తుంటే..
తలచుకొనేకొద్దీ తన్మయమవుతున్నా..
నాలో కురిసిన వెన్నెల అక్షయమై వెలుగుతుంటే..
చెప్పలేని అలౌకికానందం..
ఒక్కనేనే అనేకమై అంతర్వాణితో అనుసంధానమవుతుంటే..
అరుదుగా పూసే సిగ్గుపూల సుగంధం కదా నీ తలపు..
అందుకే..
అదుముకున్నా ఆనందాన్ని..నీ తలపులోనే దాగుందని తెలిసి..

//నీరవం//

//నీరవం//

అన్వేషణ ముగిసిందా నేత్రాలలో..
జీవితం ఆహుతయ్యిందని తెలిసిన క్షణంలో..
కలలన్నీ బూడిదరాశులుగా మారి వాస్తవమై వెక్కిరిస్తుంటే..
నిన్నల్లో నిలిచిపోయినవాడ్ని అన్వేషించి ఓడిపోయాక
అర్ధవిహీనమైన జీవితాన్ని ఒంటెద్దులా లాగుతూ..
బాధకి అభిమానమన్నదే లేనట్లు..
క్షణమైనా ఆమెను విడువక వాటేస్తుంటే..
జీవితానికి రంగూ రుచీ లేదని వాపోతూ..
హాలాహలాన్ని దిగమింగి నరకాన్ని భరిస్తూ..
మరణం అంచుకు చేరేదాక..
బ్రతుకులో సమన్వయం సాధ్యం కాదనుకుంటూ..
నీరవంలో నిలిచింది..
మౌనవించి ఆనాడూ..ఏడ్చేడ్చి ఈనాడు..

//మేఘమాల//

//మేఘమాల//

దయార్ద్రహృదయం కలిగిన ప్రియమైన మేఘం
ఆశాబంధాలు నిలబెట్టు స్వారస్య శ్యామలం
మహోపకారమే తప్ప కీడు తలవని సచేతనం..
వర్ణానికందని నీలాల మేఘమాల గమనం ..
పద్మరాగాది నవరత్నకాంతుల
ఇంద్రధనుశ్శకల అపూర్వ జననం
పుష్పలావికల చిరుచెమటలు తొలగించు వినోదం
భూతలానికి కన్నులపండుగ చేయు నీ అందం
వెండిమబ్బుల జలతారు తీవెల వెన్నెలచందం..
సమస్తవిశ్వాన వ్యాపించు నీలి రసజగం
ఇంద్రనీలమణి కలగలిసిన ముత్యాలహారం..
మహాకవులూ విద్వాంసులూ ఆదరించు అమూల్యభావం
విరహించు నదీమను సంగమించి విహరించు విలాసం
పువ్వుల జడివానతో పులకరించును సంగీతం
మదనతాపమను కార్చిచ్చును చల్లార్చు పరవశం
అలసిన మనసుల వర్షబిందువులు రాల్చు మనోహరం
కురిపించిన నీ వానతో పరిమళించును భూమి సుగంధం