//అలుకల కల//

ప్రతి ఉదయం నీకెంత ఆత్రమో
రాత్రికి కలలోకి నిన్ను రానిచ్చానో లేదోనని
చంద్రకిరణాలకి సైతం చల్లబడని నా మనసుకి తెలుసు
నీకై నిరీక్షణెంత కఠినమో

కాలమలా కదిలిపోతున్నా ఆపలేని నిస్సహాయత
మధురమైన ఊహలూ..మృదువైన నవ్వులూ
నా నుంచీ వేరు పడుతుంటే
అలుకలు అలలై నన్ను అల్లుకున్నప్పుడు
చుట్టూ సముద్రమెంతున్నా దాహం తీరదన్నట్లు
వెన్నెలెంత కురుస్తున్నా
నా తాపమిప్పుడు తీరేది కాదన్నట్లు..

సప్తస్వరాలున్న నా ఎదలో
సప్తవర్ణాల హరివిల్లు తెల్లబోయినట్లు
మౌనాన్ని రద్దుచేయాలనుందిప్పుడు కొద్దిగా
సవ్వడించే నీ ముద్దుల సద్దుగా..!!