//చివరి ప్రయాణం లోగా..//

జ్ఞాపకాల మూటను మోయలేక అలసిపోతావప్పుడు
పంచుకునేందుకు నేనుండను
ఒక తీయని మాటేదైనా ఉంటే వినిపించవూ..

నన్ను కనులారా చూడాలనుందనుకుంటావ్
కలనైనా కనబడమని అర్ధిస్తావ్
కన్ను మూసేలోగా కొన్ని క్షణాలైనా కరుణించవూ

నా పలుకు తీపులకై కలవరిస్తావప్పుడు
కానీ వినేందుకీ లోకాన్ని విడిచిపోతాను
ఈలొపే నా హృదయాన్ని ఆలకించవూ

నీ ఊసులకు మురుస్తానని తెలిసీ
మౌనంతో నన్ను నిరాకరిస్తావ్
దాచుకున్న మనసు ముసుగోసారి తీయవూ..

నాలో తప్పులనే తలపోస్తూ వెక్కిరిస్తావ్
అస్థిత్వమొకటుందని గమనించవు
నాలోని ఆవేశాన్నిప్పుడే మన్నించవూ

త్వరలో మరణం నన్ను పొలిమేర చేర్చక తప్పదు
పావుకోళ్ళు ధరించిన వసంతుడివై
ఈలోపే నన్ను దరిచేరి ఆదరించవూ..!!

Sadly..The Only Way Some People Will Learn To Love U Is After Losing U.. :(