ఆమె నవ్వింది..
అవమానాల గతాన్ని అడుసులోకి తొక్కి
ఊపిరి బరువెక్కిన క్షణాలను దాటి
చేదు కన్నీటిని విదిలించి నిశ్శబ్దాన్ని నెట్టుకుంటూ
హృదయ శకలాలను శిధిలాలకు ఒప్పగిస్తూ
తనను తానో అద్భుతమని గుర్తు చేసుకుంటూ
మనసారా నవ్వింది
ఆమె నేర్చింది..
కొత్తగా మౌనాన్ని నేర్చింది
మనసు విరిచే మాటల్ని గాలికొదిలి
వ్యర్ధమైన విషయాలపై కుతూహలాన్ని ఆపివేసి
ఆపద్ధర్మపు స్నేహాలపై ఆసక్తిని హరించి
అక్షరాలకు గొంతిచ్చి స్వరపేటికకు మూతపెట్టి
తిమిరానంతర వెలుగొచ్చి తనకు మరో పుట్టుకనిస్తుందని
మనసా వాచా నమ్మింది
ఆమె కదిలింది
అడుగులకు పైమెట్టు లక్ష్యాన్ని నిర్ణయించి
తనలోని చలనంతో ఆత్మవిశ్వాసాన్ని కూడదీసుకుంటూ
ఆశాకిరణాల కాంతిపుంజాల్లో నడక దిద్దుకుంటూ
ఉత్సాహం గొంతువిప్పు క్రొంగొత్త ఊహలను పాడుకుంటూ
చపలచిత్తాన్ని పునాదులతో పెకిలించి విముక్తి పథంవైపు
పొరలుపొరలుగా విషాదాన్ని రాల్చుకుంటూ..గెలుపు దిశగా
శూన్యాన్ని వెక్కిరిస్తూ కదిలింది..!!
No comments:
Post a Comment