//రెక్కలొచ్చినందుకే..//

వస్తున్నా..వస్తున్నా..
నువ్వు ఆహ్వానించిన కవన వనానికి
నువ్వంపిన గంధాలను నిలువెల్లా పులుముకొని

వసంతం..వెన్నెల తీగల బంధాన్ని చూపించింది

మరాళం..నాలోని సౌశీల్యాన్ని ప్రోదిచేసింది..

మయూరం..నన్ను చూసి నేర్చిన నడకలాపి నిలుచుంది

మయూఖం..నా నొసట వెలుగై ప్రకాశించింది

సంధ్యాసమయం..కుంకుమపువ్వులను అరుణరాగాన్ని ఆలపించమంది

సమీరం..మనసైన ఊహలా కదిలింది

మందారం..రెక్కలు విప్పిన సౌందర్యమై ఆహ్వానించింది

పారిజాతం..తనలోని దైవత్వాన్ని కాస్త పంచింది..

పచ్చదనం..నన్ను తనలో కలుపుకొని మెరుపులీనింది

కీరం..తన పలుకుల తేనెలతో మదిని దోచింది

కపోతం..నాకై నువ్వంపిన రాయబారాన్ని పాడింది..

వనం..వేసవిని మాయ చేసి హృదయాన్ని సేద తీర్చింది..
మానసిక దాహాన్ని వెదురు నాదముతో పోగొట్టింది..