//నిశ్శబ్ద రాగం//

మౌనానికలవాటు పడ్డ మొదట్లో
నాకేదో అయ్యిందన్నారు కొందరు
అశాశ్వతమనుకున్న కొన్నింటిని విడిచేసాక
నిశ్శబ్దమొకటి శాశ్వతముగా ఉంటానని చేరింది

ఇరుసంధ్యల స్వరాలు..అపరాహ్న మూర్ఛనలు
వెన్నెల కౌగిలింతలు మొహం మొత్తాక
భ్రమరాలూ..సీతాకోకలూ దూరమయ్యాక
కొడవాగులూ..గోగుపూలతో చెలిమి వీడాక
ఒంటరితనమో విషాదమై
నేత్రాంచలాలకు వేలికొసను దగ్గర చేసింది..

ఏ రాగమూ నచ్చలేదంటే నవ్విపోతారని
సంగీతాన్నిప్పుడు నేస్తం కట్టేసా
ఏకాంతమిప్పుడు రవళిస్తోంది..
సరికొత్త స్వరకల్పనతో తాళాలు మార్చుకుంటూ..