అగ్నిపత్రాలు రాల్చే గ్రీష్మం వెనుదిరిగకుండానే..
వానకోయిలలు తెచ్చిన మేఘసందేశానికి..
మెరుపుతీగలు తోడయ్యాయి..
సంధ్యారాగం పూసుకున్నట్లయ్యింది ప్రకృతి
మంకెనపువ్వులూ..పగడపువ్వులూ
ఎర్రనై పుట్టించిన సెగలన్నీ కడిగేస్తూ..
సంపెంగల చలికి చల్లగాలి పాట పాడినట్లు..
మట్టి పరిమళగంధానికి తనువు పులకించినట్లు
గోడచాటు కొండమల్లెలూ తడిచేట్టు..
తొలకరి జల్లో..తమకపు జల్లో..
కురిసిందిగా చిరుజల్లు..పుడమితల్లి నవ్వేట్టు..
దాహార్తితో ఎండినబీడు చిన్నగా ఒణికింది..
కోమల నవపల్లవాలు ఉలిక్కిపడ్డాయి..
మెరుస్తున్న ఆకాశంతో ప్రకృతి సర్వం రసప్లావితమైంది..
చైతన్యంలో ఓలలాడింది..
నేను సైతం అంటూ..
నిండిన సరోవరాలతో పాటుగా నా మనసూ నిండింది..!!
No comments:
Post a Comment