అదో రకం స్థబ్దత
ఏదో రాయాలని కలం పట్టి కూర్చుంటే
అక్షర హృదయం మాత్రం నిన్నే రాయమంటుంది
ఎంత వద్దనుకున్నా ఆలోచనా రహదారులన్నీ
నిన్నే గమ్యంగా నిర్దేశిస్తుంటే
చిరునామా నీ గుండెచప్పుడేనని నిర్ధారణయ్యింది
మనసుకు మక్కువైన తాదాత్మ్యతొకటి
నీ అనురాగంలో గుర్తించినందుకేమో
ఎడబాటులోనూ ఒక దగ్గరతనం పరిమళిస్తుంది..
ఆవిరైపోయిన సంతోషాన్ని తప్ప
నన్ను ప్రేమిస్తున్నావన్న నమ్మకాన్ని హత్తుకోనందుకేమో
నీవు లేని ప్రతిక్షణం విరహమై వేధిస్తుంది
నిన్ను తలచి గొణుక్కొనే ప్రతిమాటా సరిగమై రవళిస్తుంటే
నా సాన్నిధ్యమెప్పుడూ నీతోనేనని మనసు చెప్పింది
అలలు అలలుగా అనుభూతులు ఆవృత్తమవుతుంటే
నీ మనసు నా స్మృతులనే కౌగిలిస్తుందని తెలిసినా
హృదయవేదనెందుకలా చంచలిస్తుందో
మానసికోల్లాసమెందుకలా మౌనవిస్తుందో..!!
No comments:
Post a Comment