ఎదలోని మౌనం..మోహమో..మోహనమో
నీ తలపులో విహరించే ప్రతిక్షణమూ స్వర్గమై
ఏకాంతాన్ని మల్లెలుగా కూర్చుకుంటుంటే
ఆ కాస్త వివశమూ మోహమేనేమో
సౌందర్యాన్ని రచించి రాగాలను అన్వేషించేవేళ
వాలు చూపుల నుండీ జారి
పెదవులపై తారాడిన ఊహించని స్వరాలాపన మోహనమేనేమో
శిశిరపత్రాలన్నీ ఎద నట్టింట చేరి
అపురూప రంగవల్లికగా మారిన వైనం
నీరవాన్నే రాగరంజితం చేసే కలస్వనం
దరహాస పరిమళాల పారిజాతం
గాలి అలలన్నీ కెరటాలై
విరులవనాన్ని తడిమిన క్షణం
వేల మధుమాసాల కలయికేగా హృదయం
ప్రణయానికి ప్రాణం పోసే ప్రణవం..!!
No comments:
Post a Comment