మనసు వెళ్ళిన దారినల్లా
అనుసరించడం కాళ్ళకి కాని పని
కళ్ళు కలిసిన ఆనందాన్నల్లా
సొంతం చేసుకోవడం చేతికెప్పటికీ చేతనవదు
అయితే
ఎప్పటికైనా మోడు చిగురించాలనే
ఆశకు మాత్రం అంతముండదు
ప్రతి అడుగులో విషాదం వెంటబడుతున్నా
గాఢ సుషుప్తిలో ఆనందతరంగాల్లో తేలినట్లుండటం
నిదురలో నేను నవ్వుతున్నంత నిజం
ఎప్పుడో చదివిన కథలో జరిగినట్లు
కొన్ని యుగాల తర్వాత మానసిక సంగమం
క్షణకాలపు అనుభూతిని సైతం వదులుకోడానికి సిద్ధపడదు..
ఏమో
కొన్ని కులాసా రాత్రుల్లో నువ్వు కన్న కలను
నేను నిజం చేశానంటే
ఎప్పటికీ నాకు అర్ధమవదు
నాలోని శూన్యాన్ని దిగంతాలకు నెట్టి
నీ ఎద నింపిన అమృతం
నా కంటిచివరి చుక్కలో ఇప్పటికీ వెలుగులీనుతుంది..
అయినా..
కొన్ని అనుభవాలకి reasoning దొరకదు
నమ్మకాలు నిజమని నమ్మి కావాలనుకున్నది అందినా కూడా..!!
No comments:
Post a Comment