కొన్ని వేలభావాలు నీకోసం పూసి పువ్వులను తలపించి
నా అక్షరాలకి పరిమళం అంటిందనుకున్న వేళ
నువ్వో లోకంలో అందనంత దూరంలో
మరో నవ్వులో సంతోషాన్ని ఆలకిస్తుంటావ్
నా ఆకాశం నువ్వని నక్షత్రాల్ని వెక్కిరించినంత సేపు పట్టలేదేమో
మంచు దుప్పటి తెరగా మారి నా చూపులకో ఆనకట్ట వేసింది
అప్పటిదాకా కురిసిన వెన్నెలంతా తాగేసి
దాహం తీరలేదని నువ్వన్నాక
రాత్రిని ఆపాలని ప్రయత్నించి నేనోడిపోయా..
నాకు తెలుసు నువ్విటు రావని
ఏ కలలోనో రెక్కలు అతికించుకుంటూ
మరో విహారానికని సిద్ధమవుతుంటావ్
కొన్ని ఆశలు చేజారిన విషాదంలో నేనేమో
కన్నీటిని చెక్కిలిపై జారొద్దని వేడుకొంటున్నా..
హృదయాన్ని ఓదార్చుకోవడం నీకు చేతనైతే
నీకు దూరమవడం ఎంతసేపని
జ్ఞాపకమైతేనే నన్ను గుర్తిస్తావంటే
ఈ నరకాన్ని ముగించడం చిటికెలో పని..!!
No comments:
Post a Comment