//అంతేగా..//

అప్పుడప్పుడు మత్తుగా తూలే గాలి ఊసులు
ఆలకించకపోవడం మంచిదే..

ఆవరించిన చీకటిలోని అపరిపక్వత వింతలు
తెలుసుకోకపోవడంలోనే సంతోషముంది

ఒక్కోసారి మనసు మాట వినక తప్పకున్నా
అలజడి రేపే అస్పష్టాల ఆరాలు తీయరాదు

పీడకలలు రగిలించే సెగలు తలుస్తూంటే
వర్తమానం ఉనికి కోల్పోయి ఉక్కిరిబిక్కిరవుతుంది

సంతోషమనే గమ్యానికి నేర్పుగా చేరాలంటే
మనమే విషాదాన్ని ఏదోక మలుపులో విడిచిపెట్టాలి
లేదూ..
పాత్ర ముగిసేదాక నటిస్తూనే ఉండాలంటే
జీవితం అపాత్రదానమై ముగిసినా విచారించరాదు ☺️💜