//కొన్ని నవ్వులు//

అలంకృతం చేసా నా చిరునవ్వుని..
హేమంతవెన్నెల్లో నాకోసం ఎదురుచూసే
నీ కన్నుల్లోని కాంక్షను కని
నిరీక్షణా క్షణాలను సైతం అమృతపానం చేస్తూ
ఏకాంతాన్ని ఆస్వాదిస్తున్న నీ నీరవంలోకి
మౌనగీతమై వినబడాలనే తలంపుతోనే..

నా పెదవంచుని మునివేళ్ళతో తాకే మధురోహను హత్తుకుంటూ
విరహంలోని మధురిమను అనుభవైకవేద్యం చేయాలని దోబూచులాడుతూ
నీలోనే దాగిన నా పరిమళాన్ని అప్పుడప్పుడూ నీకంటగడుతూ
నాలో పాలపొంగై ఎగిసే ఉత్సాహాన్ని అదిమిపెడుతూ..

నీ ఊపిరి వేణువై నాలో సెగలు రేపేవరకూ
నాలో తమకాన్నలాగే ఆగమంటూ..
గుండెసవ్వడి తలదాల్చి వినేవరకూ
నీ తలపులనలాగే హత్తుకుంటూ..
అరవిరిసిన మందారనవ్వు నేమాత్రం వాడనివ్వక..
తొలిమచ్చికలో నీకు కానుకివ్వాలని..
కాపాడుకొస్తున్నా..!!