//నారింజ ప్రేమ//

ఎప్పుడు ప్రేమయ్యిందో తెలియదు
నారింజరంగును ఇష్టపడటం సైతం గుర్తులేదు..
ఎన్ని సాయంసంధ్యవార్పుల్ని తిలకించానో
కెంజాయివర్ణపు ఆకాశాన్నంతగా పరీక్షించలేదు..
మిసమిసలాడుతూ నోరూరించే నారింజపండు
సరసంగా గొంతులో జారినప్పుడూ నచ్చుకోలేదు..
అమ్మ కట్టిన నారింజ పట్టుపుట్టమేనాడూ మెచ్చలేదు..
అరవిరిసిన దానిమ్మపువ్వు నారింజ రంగేమిటో అర్ధం కాలేదు..
ఆనాడు నేను కట్టిన నారింజ వాయిలు చీర..
అతని కన్నుల్లో తటిల్లతలు మెరిపించినప్పుడు..
నన్నో అపరంజిని చేసి అపురూపంగా చూసాడని గుర్తించా..
సింధూరపువ్వంటే తెలుసా నీకన్నప్పుడు..
రెప్పమూసి తెరిచేలోపే కన్నుగీటి కరుమరుగైనప్పుడు..
తలవంచి తనువును హత్తుకున్న నారింజరంగుని చూసా..
లేతబంగారు వర్ణానికి ధీటుగా అమరిన సొగసు..
నారింజరంగులో ప్రతిబంబించి అరుణిమైన మోము..
మునుపులేని సిగ్గుని పరిచయించిందప్పుడే బుగ్గలకని..
ప్రేమలోకానికి చేయందించి ఆహ్వానించబోతోందని గ్రహించా..
అప్పుడే మొదలయ్యిందేమో నారింజ ప్రేమ నాలో..!!