// అడగాలని ఉంది..//

నిశ్శబ్దాన్ని రాల్చుతున్న ఆకాశానికెంత కష్టమొచ్చిందో
నిచ్చెనమెట్ల మీదుగా ఆరాతీసినా దాని గొంతే వినబడనట్లు
కలలు పారేసుకున్న దారిలో ఎంత దూరం నడిచినా
ఆద్యంతం లేని విషాదం మాత్రం వెనుకే వస్తుంది

అన్ని సీతాకోకలకి రంగులేసేంత ఓపికున్న దేవుడికి
నన్నెందుకు చిమటగా మిగిలించాడో వెతికి అడగాలని..
రెక్కలొచ్చినప్పుడంతా కిటికీలోంచీ ఎగరాలనుకుంటానా
గాలొచ్చి గాయాన్ని గుర్తుచేసి మరీ జోకొడుతుంది

ఇంత చెప్పినా నువ్వేం నమ్మవుగానీ..
అందానికి అవతలున్న ప్రతిబింబం తెలుసా నీకు
ఆ రెప్పల కింద సముద్రముందని తెలియాలంటే
నా చెక్కిలి రుచి చూడవలసిందే నువ్వొకసారి 🙂