// చెప్పేదేముంది..//

చెప్పేదేముంది
రోజూలానే ఉదయమయ్యింది
వేకువ కన్నుతెరిచి
మృదువైన కోలాహలాన్ని తెచ్చింది
గుర్తుతెలియని రాగాలు రెక్కలిప్పుకున్న గువ్వలై
పూల తెమ్మెర పదాలు సహా
జీవనగీతం వినిపిస్తున్నాయి

కానీ
చిరునవ్వుకి కారణం వెతుకుతున్న సమయమిది
కన్నీటితెర వెనుక జ్ఞాపకాల పారవశ్యాలు
దిగులుమేఘపు కవిత్వాన్ని పాడమంటున్నా
ఊపిరాడనివ్వని ఉక్కబోత
ఒక్క కలనీ తొడుక్కోనివ్వలేదు

వసంతానికీ విషాదం తెలుసనుకుంటా
అంతర్లోకపు నిరసనేదో నిశ్శబ్దాన్నే కోరుతున్నట్టు
గొంతు సవరించినా అపస్వరాలు
తలపుని కలుపుకోలేకపోతున్న కాలం
అలలు నెమ్మదిస్తున్నట్లనిపిస్తున్న గుండెసముద్రం 😣