//మెలంఖలీ//

//మెలంఖలీ//

గమ్యమెరుగని జీవన పయనంలో
నిలకడలేని నిముషాలతో
పోటీపడుతూ
జ్ఞాపకాల ఊరేగింపును దాటుకుంటూ
ముందుకు పోవాలని
ప్రయత్నించిన ప్రతిసారీ
ఏవో పొలికేకల శబ్దాలకు ఉలికిపాట్లు..

అరలుగా నిండిన అశక్తత
అగుపడని చెరసాలలో బంధించినట్లు
వశీకరించిన అనుభవాలను కూడి
వద్దనుకుంటూనే
అదే పనిగా
బరువెక్కిన శూన్యాన్ని మోస్తుంటుంది..

ఒక మెలంఖలీ
మనసు గుండా ప్రవహిస్తూ
తనలో తాను మమేకమై
భావోద్వేగాన్ని జయించాలనుకొని
ఒంటరితనానికి బానిసయ్యింది..

ఈ తలపుల దండయాత్రలు
అశాంతిశిఖరాలను దాటి
నిశ్శబ్దాన్ని వెలిగించాలనే యాతనలోనే
కొన్ని రాత్రుల కలవరింపులు
బదులు దొరకని ప్రశ్నల ప్రకంపనలు..!!