కొందరుంటారలా..
ఎదుటివారి బాధలు స్పష్టంగా తెలుస్తున్నా
కావాలనే రెచ్చగొడుతూ
తమ 'ఓటితనాన్ని' బయటేసుకుంటారు
మహాద్భుతాన్ని దర్శించాలని ఈదురుగాలికి ఎదురెళ్ళి
వ్యామోహమనే వలలోచిక్కి
కీచురాళ్ళ రొదనే వల్లిస్తుంటారు
'మాయ' తోడుగా ప్రయాణం చేస్తున్న మనిషికి
వస్తుభ్రాంతి పట్ల..
'నేను' తనం పట్ల విపరీతమైన ఆకర్షణ ఉంటుంది
మరొకరి గుండెల్లో ఆర్తి నింపడం తెలీకపోయినా
గిచ్చి గాయంచేసే అలవాటు ఒదులుకోరు
సమస్యల వలయంలో ఉన్నా,
హాయి మైదానాన్ని సృష్టించుకోగలగాలంటే
ప్రేమ 'పెట్టుపోతల' విలువలు తెలిసుండాలి
చీకటిలో నిద్రలేచే జ్ఞాపకాలకి పరిమళమున్నట్టు
జీవితాన్ని మచ్చిక చేసుకున్నవారికి మాత్రమే,
ఏకాకితనాన్నీ.. వాక్యంగా రాసుకోగలిగే విలక్షణముంటుంది 
No comments:
Post a Comment