//కాలం//

అనుభవాల ఆకృతుల్ని
అందంగా చిత్రించు కాలం
శిల్పాన్ని శిలగానూ మార్చగలదేమో

అదేమో
రెప్పల మాటు కలగా ఉంటూనే
కన్నీటినీ తలపులకు తోడిస్తుంది

తమకంగా మారాల్సిన కెరటాన్ని
ఒడ్డుకి చేరి మురిసేలోపునే
వెనుకకు మరలమని శాసిస్తుంది

అందుకే
మన ఇతిహాసంపై సంతకం చేయాల్సిన మనసు
గాయం చేసి కనుమరుగవుతుంది
జీవితపు ఉనికిని
ప్రపంచానికి పరిచయం చేయాల్సింది పోయి
పలాయన వాదాన్ని ప్రోత్సహిస్తుంది

విముక్తి పొందేందుకు
స్వప్నంలోకి అదృశ్యమైన ఆత్మను
మనోగగనపు పొలిమేరల్లోనే ఆపేస్తుంది

నీటి మీద రాసిన రాతలా
మారిన జీవితం
కథగా చెప్పుకోవడానికి తప్ప
కలవరించేందుకేం మిగిల్చిందని

కాలమిప్పటికే కంగారు పడుతూ కదులుతుంటుంది..
కాసేపు ఆగమనేలోపు ఎన్ని జ్ఞాపకాలు జారిపోతాయో
కొన్ని పులకింతలనైనా రెప్పలపై వెచ్చబడేందుకు అనుమతినిస్తుందో లేదో అడగాలి 🙂