//నువ్వంటే ఇదేగా..//

నవ్వే పెదాల మౌనం
విసిరే చూపుల బాణం
నువ్వంటే ఇదేగా..

వెలుగు కిరణాల వాకిళ్ళను దాటి
హృదయంలో లేలేతవెన్నెల కురిపిస్తున్న
అరమోడ్చిన చందమామ నువ్వేనని
నీ అల్లరి కదలికలతో పోల్చుకున్నా..

నేనులేని రాతిరి నీలో అలికిడంటే
అది నా పేర కలవరింతేగా..
ఊపిరి పరిమళం నిండిన మనసుపొరల్లో
ఎప్పటికీ ఆవిరవని ఆనందం కదా ఇది

ఆవును..శ్రావణంలో కోయిల కూసినంత మధురం
హా...
నాకు తెలిసింది ఇదొక్కటే..
నా జీవితం నీ తలపుల నిత్య విరహగీతం 💕💜