గుప్పిట దాగని గుబులేదో..
గుండెలో జొరబడి సొదపెట్టగా
సానబెట్టలేని భావాలు కొన్ని..గరుకుగా గుండెను కోసేస్తుంటే
తెలియని నొప్పి శరీరాన్ని నలిపేస్తుంది..
ఒకప్పుడు అనుభవమనుకున్న ఇంద్రజాలమేదో
విషాదపు నిషాదమై గతాన్ని గుర్తుచేసి గుచ్చుతుంటే..
కన్నులముందు చీకటితెరేదో పరుచుకుంటూ..
ఉన్న కాస్త వెలుతురునీ దూరం చేసింది..
నా జీవితం నా ఆధీనంలోనిదేనని తెలిసినా
నీ మనసు నియంత్రిస్తున్న భావనలు..
నలుగురిలో నన్ను ఒంటరిని చేసి నిలబెడుతూ..
నా అనుకొనే అస్తిత్వపు ఆనవాళ్ళనూ తుడిచిచిపెట్టేస్తూ..!!
No comments:
Post a Comment