ఎన్నిసార్లు మదిలోంచీ చెరుపుతావో నన్ను..
రానంటున్నా పదేపదే నీ ఊహాల్లోకి ఆహ్వానిస్తావు..
మౌనంగా నేనున్నా..
మాటలమల్లెలతో వలవేసినట్లు బంధిస్తావు
నీ ఊసులతో ఉక్కిరిబిక్కిరైన నన్ను..
తిరిగి ఊపిరితో ఉసురుపోసి కౌగిలిస్తావు..
నిద్దురలోనే అటూఇటూ కదులుతూ నీలోకి ఒదిగించుకుంటావు..
ఇంతా చేసిన నువ్వు..
అనుభూతికి అందలేదని నన్ను నిందిస్తావెందుకో..
నీ హృదయలోతుల్లోకి అడుగులేసేందుకు నే తడబడుతుంటే..
స్పర్శదీక్ష ఇచ్చి మరీ చేరదీస్తావు..
మత్తేభమంటి మైకపు మంత్రాలు కూర్చి..
మనసును రాగాలకెరటాలలో ముంచుతావు..
ప్రేమస్వరాలు వినిపించేలా నాలో ప్రతితంత్రినీ మీటుతావు..
నులివెచ్చని హృదయార్తిని మెత్తగా తాగుతావు..
అయినా స్వాతిశయమెందుకోయ్ నీకు..
నేనంటే ఇష్టమనే భావం నాతో చెప్పకుండానే నీకు ఆనందమిస్తే..
మదిలోనే దాచుకోక..
రహస్యమైనదేమో రట్టయినట్టు..
మౌనం మాట తప్పిందని విస్తుపోతావెందుకు..
చూపులతోనే చతుర్లాడే నీ చిలిపితనం నాకు తెలియనట్టు..!!
No comments:
Post a Comment