చెదిరిపోని స్వప్నమొకటి..
పదేపదే నిద్దురను భగ్నం చేస్తూ
మానిపోయిన గాయాన్ని పదేపదే రేపుతుంటే..
అదే మంటను తిరగతోడినట్టు..
ఒకపక్క శిశిరం రాలిపోతూనే..వసంతానికి తొందరపడమంటుంటే..
పరుగెత్తే కాలానికి కాలడ్డుపెట్టి ఆగమన్నట్లు..
ఋతువులను శాసించాలనే ప్రయత్నమేదో..
కన్నీరు ఇంకిపోయిన చూపుల్లో గ్రీష్మాన్ని వెక్కిరిస్తూ
ఘనీభవించిన మదిలోని తడి వర్షమై కురుస్తుందో లేదోనని పరీక్షిస్తూ
రంగురంగుల స్మృతుల గవ్వలు గలగలమంటూ
గుండెసవ్వడిని పెంచేస్తుంటే
ఊరించే ఉషస్సులూ..కదిలించే సంధ్యలూ కరిగిపోగా
రాతిరవుతుంటే భయమేస్తోంది..
మరో దుస్స్వప్న వీక్షణానికి సిద్దం కాలేక
రెక్కలు విప్పేందుకు సిద్ధమయ్యే ఊహలకు ఉరేయలేక..!!
No comments:
Post a Comment