//శరద్వెన్నెల//

ఏకాంతపు పొదరింట్లో
ప్రపంచాన్ని మరిపించేంత పరవశం ప్రవహించాలంటే
రెప్ప వాల్చని నక్షత్రాలుగా కదిలే ప్రేమభావం
వెచ్చని పలకరింపుగా తడమాలనిపించింది

సముద్రం సంగీతాన్ని ఆలపిస్తున్న రహస్యం
అందమైన నా ఊహాలోకమైతే
ఇన్ని లక్షల పువ్వులెవరు నింపారో
నా అంతరంగమిలా మత్తెక్కించు విస్మయమయ్యింది

ఆచ్ఛాదన తొలిగిన సహజత్వం
సౌందర్యానికి చిరునామా కనుక
ఎదలో స్పందన పెదవులపై ఎగిసి
నిశ్శబ్దాన్ని మధురం చేసింది

నిర్వచించలేని ఆ పుచ్చపండు శరద్వెన్నెల
ఉద్వేగమై పొంగిపొరలిన మధువుగా మారి
చప్పుడు చేయకనే ఎదను తడిపి
అనుభూతి మెండుగా మహత్తు కురిపించింది..💕💜